El papà de tuti son mi ! El Testamento del Sior Nadalin de Verona

Meio che i tasa certi ciarlatani che i la sa longa. Ve lo digo mi che non son nato dai cavalieri de Vilafranca che el zucaro i l’avea visto solo dal spezial. Mi de zucaro ghe no tanto parchè son dolzo come el Nadal, quando tuti i dovaria ersar più boni. L’è dopo l’otozento e du che i dolzi iè vignui fora da le corti de Vienna e Parigi dove i podea permetarse de doparar el zucaro, intanto che noaltri serimo poareti. Eco son nato in sto periodo qua, da ci non se sà, ma de sicuro el me inventor l’era bon de laorar con el levà senza che el deventa acido e el spiziga in boca. L’è che levà li che se mantien de giornada in giornada e che vinti, trenta o quarant’ani fa l’era za doparà dai fornari che col so forno de bona matina i profumava el paese e i rendea più dolza la gente.
Son tuto un simbolo de Nadal. La stela che nase quasi par miracolo taiando na bala de pasta con quatro sfrisi, el marzapan fato con i pinoi che vien fora dale pigne dela tradizion de Nadal, el zucaro e l’anese stelà che vien doparà par far el liquor.
Son frolo e son più bon se i me pocia o i fa la zupa con el vin dolzo o ne la ciocolata.
Vignendo al dunque, un giorno, a un droghier de Verona ghè vignù l’idea de no farghe taiar le bale de pasta ai so pasticeri, ma el gha fato smolar la pasta e la fata metar in na camisa de forza e l’è stà così che è nato me fiol alto e snelo. Al picinin i ghà dato nome Pandoro.
Ma dentro ghe son ancora mi, i m’a cavà i pignoi, i m’ha inciprià de zucaro e adeso i vol farme morir del tuto.
Me fiol poarin el me fa pecà, i me l’ha bistratà in tuti i modi i ghe mete el conservante azido che sa da piè; se te ve vizin al sacheto e no te lo tien distante dal naso te mori dala spuza e dal velen.
I le fa siè mesi prima, i le ingiaza e i le sgiaza, i ghe mete le cremete i le truca e ci sà fin dove rivaremo. Dovelo el so profumo de apena coto, el profumo de buro, tanto odor da graso de mascio e de galina boio la così deta margarina, ma do ei i so profumi? E’ si me fiol Pandoro el fa la fine de so cusin el Paneton. All’ arancio e al contreau , al cioccolato e non so a cosa se rivarà, forse al Pandoro al menta o ai fruti de bosco?
Adeso ve si inventè anca de metar un poca de pasta nel stampo a stela e ciamarlo Nadalin. Mi Nadalin nel stampo? Nel stampo de carton? Parchè fasì prima a farlo! Ma chel li non son mia mi, che li no l’è nianca me parente.
E i pasticeri de verona do ei andar a finir? Tuti sconti dedrio ai so taoli ma tuti presidenti!

VEGNI’ FORA BOGONI!

Tornè indrio e volive ben, si tuti na fameia, no si taià a fete come i me taia mi.
Mi quel che gavea da dir lo dito, adeso son alo spizio e ricordo le bele giornade quando i me ciamava ale feste e i me prenotava tri, quatro giorni prima, parchè se no ghero sule taole no l’era mia Nadal.

Vecio e straco Nadalin de Verona


(G. Perbellini)

 

Q&Q Gruppo Mangibene
Via Barbarani, 5/c
Loc. San Zeno
37060 Mozzecane (Verona) Italia
Tel. 0039-045-6310212 Fax. 0039-045-7930286